पक्षी हा संतुलित पर्यावरणाचा अविभाज्य घटक आहे, याविषयी पालकांसाेबत चर्चा करा.

उत्तर: पक्षी हा संतुलित पर्यावरणाचा अविभाज्य घटक आहे कारण पर्यावरण संतुलित राखण्यास पक्षी मदत करत असतात. शेतातील पिकांचा नाश करणारे कीटक हे पक्ष्यांचे अन्न आहे. कावळे, निळकंठ यांसारखे पक्षी कीटक व त्यांची अंडी खाऊन कीटकांची संख्या नियंत्रित करण्यास मदत करतात आणि किडींपासून पिकांचे रक्षण होण्यास मदत होते. कोकिळा, मैना, कबुतरे हे पक्षी फळे खातात आणि बिया बऱ्याच ठिकाणी टाकतात. ज्याठिकाणी या बिया पडतात तेथे नवीन झाडांची निर्मिती होते. तसेच पक्षी परागीभवनाचे काम करतात. शेतीची नासाडी करणारे आणि अनेक आजार पसरवणारे उंदीर-घुशी यांना खाण्याचे काम शिकारी पक्षी करतात. उदा. गरुड, घुबड तसेच मोठ्या मोठ्या मेलेल्या प्राण्यांना खाऊन निसर्ग स्वच्छ ठेवण्याचे काम गरुड, गिधाड हे पक्षी करत असतात. म्हणून पर्यावरणामध्ये पक्ष्यांचे महत्त्व अनन्यसाधारण आहे.

पक्ष्यांची संख्या वाढवण्यासाठी तुम्ही काय करू शकता, याविषयी मित्रांसोबत चर्चा करून यादी तयार करा.

उत्तर: वाढत चाललेल्या तापमानामुळे वृक्षतोडीमुळे आणि शहरीकरणामुळे पक्ष्यांची संख्या घटत चालली आहे. ही संख्या वाढावी म्हणून मी गच्चीमध्ये, खिडकीत, बाल्कनीत पक्ष्यांसाठी खाद्य आणि त्यांना पिण्याच्या पाण्याची सोय करेन. कारण उन्हाळ्यामध्ये पक्ष्यांना पाणी मिळत नाही आणि पाण्यावाचून त्यांना आपले प्राण गमवावे लागतात. फुले व फळे देणारी झाडे लावेन ज्यामुळे पक्ष्यांना अन्न मिळेल. लोकांना सांगेन की प्रत्येकाने किमान एक झाड लावा कारण पक्ष्यांचे आश्रयस्थान असलेली झाडे नष्ट होत आहेत.